مواقف وطرائف مضحكه جدا......!!!!!

[الجواب المفقود]

السلام عليكم
والله انا فكرت كثيرا جدا بعد ما سمعت الحديث
ابتسم في وجه اخيك صدقه
وايضا عندما سالوا عن الصحابه هل كانوا يضحكون ؟ قالوا لا
بل كانوا يضحكون ويضحكون ويضحكون
وايضا عندما سمعت سؤال هل كان الرسول يضحك ؟ نعم
عن أنس بن مالك رضي الله عنه قال ضحك رسول الله صلى الله عليه وسلم ذات يوم وابتسم فقال صلى الله عليه وسلم: "ألا تسألوني عن أي شيء ضحكت ؟" قالوا يا رسول الله من أي شيء ضحكت ؟ قال صلى الله عليه وسلم: "عجبت من مجادلة العبد ربه يوم القيامة.........
وكان هناك خطبه للشيخ محمد حسين يعقوب بيروي فيها قصه جميله
كان يزور احد الاصدقاء وبعد ان انهوا وجبة الغداء جلسوا يتحدثون قليلا وفجأة ضحك الشيخ محمد حسين يعقوب
فقالت زوجة الصديق ايه ده – ده بيضحك
فقال الشيخ محمد حسين يعقوب رساله للملتزمين الا وهي
من فضلك ابتسم
حاولت ابحث عن وسيله للبسمه او كيفية توصيل البسمه اليكم
لم اجد سوى هذه الفكرة الا وهي ان اكتب لكم مواقف او احداث قد حدثت لي وتكون هذه الموقف مضحكه
واطلب منكم انتم ايضا ان تكتبوا مواقف مرة عليكم واضحكتكم
ليه ؟
منها نستفيد ومنها ندخل البسمه على قلوب الاعضاء من المواقف ونحاول نخف مش اثر المشاكل هذا بالاضافة الى تاثير السحر للضحك على حل المشاكل الصعبه
وكمان المنتدى يكون كامل من كل حاجه دين وضحك وجد وبرامج وما الى ذلك
ونبدأ باول قصه النهارده
مش عارف أركز
السلام عليكم
انتوا بتسألوا أنا مش عارف أركز في إيه مش كده أقولكوا
أنا زيي زى أي شاب بيسهو في الصلاة
وهيه دي المشكلة
إني مش عارف أركز في الصلاة
فقررت إني أشوف حل للموضوع ده
تخيلوا معي أحلها ازاي ؟
سمعت شيوخ كتييييييير قالت حاول تركز وربنا يعينك
لكن الحل ده مش عملي بالنسبة لي وأنا خصوصا مش بحب الحلول التقليدية
عشان كده فكرت ولقيت حل دمه خفيف قوي لكن كان له اثر السحر عندي حقيقي والله
قررت استعمل أقوى صفاتي لحل هذه المشكلة
وكانت أقوى صفه عندي هي الخيال الخصب
وفعلا لقيت إنها انسب وسيله لعلاج مسالة السهو
تعرفوا ازاي ؟
من غير ضحك
تخيلت إني في زنزانة وبيستعملوا معي وسائل التعذيب المعتادة
طبعا من ضمن هذه الوسائل دخول الكلاب الجائعة لمدة 3 أو 4 أيام على السجين
بجد والله مش بهزر ده حصل أنا عملت كده
ولما سمعت أصوات الكلاب على باب السجن وأنا زيي زى أي شاب طبعا بيخاف من الكلاب بس الحمد لله الان تغلبت على هذه المشكله
قمت للصلاة
تعالوا نشوف إيه اللي حصل معي من غير ضحك
كان هذا كما اتفقنا انه خيال مش اكتر
بدأت اصلي وأنا في عقلي صوت الكلاب بتقول زى ما إحنا عارفين
هوهوهوهوهوهو
وإذا بصوت كلب حقيقي يصرخ في أذني كان في الشارع وأنا ساكن في الدور الأول
يعني تحس إن الكلب معاك في الشقة
اتفزعت لكن ثبت مكاني خوفا من الخروج عن الصلاة
بعدها أكملت الموقف في خيالي ازاي؟
تخيلت إنهم دخلوا الكلب عندي في الزنزانة
وفضل يهوهو يعيني وينبح في صوته
وأنا واقف بجد كنت حاسس انه فعلا واقف أمامي أمام سجادة الصلاة لدرجة إني خفت افتح عيني خوفا من أن أجده أمامي وخصوصا لما سمعت صوت الكلب في الشارع
والله ده حصل
المهم زاد خيالي حسيت انه أصبح حقيقة
وحسيت إني في الزنزانة فعلا لدرجة إني حسيت إني شايف شكل الزنزانة
فعلا يا جماعه والله ركزت في الصلاة جدا
تعرفوا ليه ؟
مش هقولكوا إني كنت مع ربنا كخشوع ولكن خوفا من الكلب الذي أتخيله أمامي
تضرعت إلى الله كي يحميني منه
واقسم لكم بعد أول ركعه نسيت الكلب وكل شيء ولم اشعر بنفسي إلا وأنا اختم الصلاة
تعرفوا أنا كنت بصلي ازاي الأول
كنت بنقر الصلاة نقر الديوك فعلا بصلي بسرعة رهيبة
لكن الصلاة دي على العكس تماما
كنت بصلي على مهلي جدا
طبعا انتوا عارفين لو عملت حركه للكلب ممكن يهجم عليك أنا كنت بفكر كده فعلا
لأني زى ما قلتلكوا أنا تخيلت انه أمامي
فكنت أتحرك بهدوء واركع واسجد بهدوء
إلى أن أنهيت الصلاة
أنا عارف إن في ناس مش مصدقه بس ده حقيقي والله
من بعدها قررت إني لما اصلي وأسهو في الصلاة افتكر الكلب
بعدها ارجع على طووووووول لخشوعي
ده كان حل عشاني ممكن يناسب واحد لكن أكيد مش الكل عشان كده كل واحد يفكر ازاي
يلاقي وسيله عشان يخشع في صلاته
اللهم ارزقنا الخشوع
بس نصيحه ابعدوا عن الكلاب

[الإمبراطــ999ــور]

وعليكم السلام ورحمة الله وبركاته

هههههههههههههههههههههههههههههه شكراً اخي الجواب الفقود على هذه القصص

[بحر الإسلام]

شكرا لك أخى الجواب المفقود على هذا الموضوع ألأكثر من رائع

ويارب نخشع كلنا فى صلاتنا ولانسهو فيها

أمين يارب العالمين

[الجواب المفقود]

هلا شباب
ها ايه الاخبار
تعالوا بسرعه نحكي القصه دي ونشوف انا عملت ايه فيها
القصه دي فعلا غريبه بجد
بس انا نبهتكوا انا اسمي وانا صغير عبده التايه
المهم
كانت والدتي موظفه كغالبية السيدات
وكانت تاخذني في الصباح وانا طفل الى خالتي وتتكرني عندها حتى تعود من العمل
وكنت احب خالتي هذه جدا
على الرغم من صغر سني فقد كنت في ذلك الوقت صغير لدرجة اني كنت لازلت احبو
ذات يوم خرجت خالتي
فخرجت خلفها وهذا ما قالوه لي عندما اصبحت شاب
واسمعوا الحكايه
عندما خرجت خالتي تعلقت بها ولكن تركتني ولم تاخذني معها
هل اتركها تخرج هكذا طبعا لا
تركتها تخرج وخرجت خلفها حبوا
وكانت تسير امامي وهي ترتدي جبابا اسود كعادة النساء قديما
وضللت اسير خلفها الى ان اتت واحدة اخرى ترتدي جلباب اسود فاختلط الامر عندي
ولم اعرف أي من هاتين هي خالتي
المهم
واحدة منهم تحرك في اتجاه البحر او الاصح النيل
فتحركت خلفها
وظللت اسير اسير الى ان وصلت الى النيل
وعندما رايت النيل جن جنوني فكنت مغرما منذ نعومة اظافري بالماء
فذهبت الى الماء
وفجاة
بؤبؤبؤبؤبؤبؤبؤبؤ
بمعنى اصح وقعت في الماء
واذا بواحدة من النساء التي كانت تغسل غسيلها في النيل
تشاهد الفقاقيع تخرج من الماء
فمدت يدها والتقطتني
واذا بي طفل دمه زي العسل شبه الكتكوت الغرقان
بس الحاجه الغريبه في الموضوع ده
اني كنت خارج مبتسم مش عارف ليه
المهم جففتني وبحثت في كل مكان حولها عن اهل الطفل
وفجاة سمعت ان هناك اسرة تبحث عن طفل مفقود
فأخذت تجري الى الاسرة وهي تحملني
ووجدت ان هناك سيدة تكاد تجن واخرى تبحث في كل مكان
ومعهم باقي المنطقه تبحث عني
وعندما راتني امي وخالتي فرحوا وسالوها
اين وجدتي الطفل ؟
قالت عند البحر
فاستغربوا وجلسوا يحاولون تفسير الامر الى ان علموا بالحكايه التي سردتها اليكم
طبعا خالتي رفضت بعد ذلك ان تأخذني الى ان تاتي امي خوفا مني ان اذهب الى مكان اخر دون ان يدري احد مكاني
ومن هذا اليوم فعندما تذهب امي الى السوق وترى السيده التي انقذتني فتسالها على احوالي وتقول لها
ايه اخبار ابني ؟ تقصدني انا
وهكذا اصبحت المنطقه كلها اما بابا لي او ماما
ومن ذلك اليوم اشتهر اسمي وذاع سيطي في المنطه
واصبحت الطفل صاحب صورة الغلاف في.......
التوهان
تعالوا نشوف ايه اللي ممكن نستفيده من الحكايه دي
بمعنى اصح تاعلوا نشوف الحل لمشكلة
عمل الام وكيفية التصرف في الابناء اثناء العمل
لو اننا عملنا نوع من انواع الاكتفاء الذاتي ممكن تتحل مشكلة كل ام وكل اب بيعملوا
ازاي
لو اننا بحثنا عن سيده تستطيع ان تراعي الابناء نظير مبلغ صغير من المال
فبهذا من الممكن ان تفادى عدم اهتمام الاخرين بابنائنا
وايضا الذهاب الى العمل دون خوف على الابناء والاهتمام بالعمل
مش كده ولا ايه

[x knight]

جزاك الله خيراً ياجواب على القصص الرائعه...
أخيك الفارس المجهول

[الجواب المفقود]

شكرا اخي الفارس المجهول على مرورك
واتمنى ان تنال المواضيع اعجابك
اخوك في الله

[الجواب المفقود]

السلام عليكم
معدنا مع قصه جديده او الاصح موقف طريف جديد
موقفنا النهارده هو موقف حصل لي في مطار القاهره
في يوم كنت ذاهب لاسال على دورة كمبيوتر وكمان دورة تدريب وتنمية قدرات وحصل ما حصل
كان مكان الدوره قريب من مطار القاهره وكنت ركبت الاتوبيس للذهاب الى مكان الدورات الاتوبيس ده اخر محطه ليه هي مطار القاهره
وكنت لم ارى المطار منذ زمن بعيد فقلت لنفسي
أي رايك يا واد تكمل مع الاتوبيس لحد المطار وتتفرج على المطار والناس الموجوده فيه
الفكره بصراحه كانت حلوه وعجباني وفعلا نفذتها مش عارف ازاي
المهم وصل الاتوبيس للمطار فنزلت وانا نازل سالت سائق الاتوبيس هل الاتوبيس ده بيذهب لمحطة كذا قال اه
بعد ما رد عليه سيبته ومشيت ناحية المطار الراجل بص لي بنظرة استغراب وسال طب انا سالته ليه لما ان مش هركب الاتوبيس
الفكره اني سالت عشان اطمن اني هعرف ارجع بيتنا اصل بيتنا بعيد عن المطار جدا ومش هعرف ارجع لوحدي
المهم دخلت المطار من الداخل بس مقدرتش اكمل عشان كان ممنوع ادخل قوي المهم عملت اني مستني واحد صحبي جاي من أي بلد وفضلت نصف ساعه منتظر انا عارف انكوا بتقولوا انا منتظر مين
انا مش منتظر حد انا بهزر مع نفسي نوع من انواع الدعابه بس مع نفسي
المهم وجدت اني سامع صوت طيارات لكن مش شايفها
اعمل ايه انا عاوز اشوف طياره
طبعا في الوقت ده عرفت اني مجنون لاني بمشي ورا دماغي بسرعه جدا
وكنت حاسس اني هروح في كارثه لو مشيت وراها لكن اعمل ايه دماغي بقى
المهم سالت سائق عربيه المطار
لو سمحت انا عاوز اشوف طياره ؟ يا رتني ما سالت السؤال ده
عارفين ليه لانه فضل تقريبا يضحك لمدة 5 دقائق من غير ما يفصل
وفي الاخر بعد ما جمع نفسه قال لي انت بتتكلم جد
قلت له اه والله انا نفسي اشوفها من صغيري
قال انت ممكن تقف جنبي وتشوف الطياره وهي طلعه
قلته لا انا عاوز اشوفها وهيه واقفه
قال لي طيب امشي من هنا على طول وانت هتلاقي جراج الطيارات وممكن تشوفها وهيه على الارض
مشيت زي ما وصف لكن للاسف تهت مش عارف اوصل ادور يمين مفيش طب شمال مفيش اعمل ايه
هههههههههههههههههههه
لقيت عسكري قاعد على جنب كده
رحت وسالته
سلاموا عليكوا
عليكم السلام
لو سمحت انا عاوز اشوف طياره ؟
نعم عاوز ايه ؟
انا عاوز اشوف طياره ؟
ازاي يعني ؟
اصل انا هقول لحضرتك على حاجه انا من صغري ونفسي اشوف طياره لكن ده محصلش وانا كنت هنا في مشوار قريب من المطار قولت فرصه اشوف الطيارات وانا جنبها
طيب تعالى اقعد هنا جنبي لحد لما اجد احد يوصلك للطياره
طبعا كان بينظر لي بشكل غريب
طبعا مستنكر كلامي بس مكنتش متوقع اللي هيحصل
المهم قعدت جنبه وانتظرت الراجل اللي هيوصلني للطياره
فجأه لقيت العسكري بينادي على نقيب في الاسلكي
طبعا كده فهمتوا العسكري بينادي على رتبه اكبر منه عشان تحل المشكله بتاعت اللي عاوز يشوف طياره مش عشان يوصلني
فسالته هو صعب ان حد يشوف طياره هنا ولا ايه
فرد وقال انت بتتكلم جد
قلت والله انا نفسي اشوف طياره
قال لي انا والله اول مره اشوف حد بالشكل ده
على العموم ربنا يهديك ولو عاوز تشوف طياره امشي كده على طول هتلاقي الطيارات على جنب بس لو حد سالك انت ماشي هنا ليه قول انا عاوز اروح بس تهت في الطريق
لكن اوعى تقول انا عاوز اشوف طياره لانه ممكن يفتح لك س وج
وعنها مشيت لحد لما وصلت لاقرب مكان للطيارات ووقفت
ويارتني ما وقفت
فجأه مين هناك انت يا استاذ
طبعا الاستاذ قطع اذنه وطلع يجري على قد ما قدر ولو كان وقف ثانيه واحده كان زمانه بيكتب مذكراته في سجن المطار
وده جزاء أي واحد عاوز يشوف طياره هذه الايام
وايضا جزاء من يمشي وراء دماغه
ونأتي الى الاستفاده من هذه القصه
1 – واستعينوا على قضاء حوائجكم بالكتمان
طبعا لو كنت انا كتمت خبري وبحثت بدقه اكثر وصبر اكثر كنت وجدت مكان مخزن الطائرات
2 – الصبر
ان كان ليك هدف لابد ان تصبر حتى تحققه مهما واجهت من عقبات
3 - اغتنام كل ما يحلو الى نفسك من افكار حلال
وذلك لانك كلما نفذت فكره حلال اتت اليك فانك تشعر بعد تنفيذها بانك قد شحنت طاقاتك من جديد وتجد الاحساس انك لديك القدرة على عمل المزيد من الاعمال الطيبه او التطوير او ما الى ذلك

واتمنى من الله ان يكون الموقف قد اعجبكم
وادعوا من الله الا يتكرر معي مرة اخرى حتى لا يكون مصيري سجن ابو غريب او جوانتاما المره القادمه ولا يمكنني بعدها سرد لكم الموقف المضحكه
اخوكم في الله
الجواب المفقود

[الجواب المفقود]

ايه يا شباب انا مش شايف اي قصص
ايه مفيش حد مر عليه موقف مضحك ممكن يحكيه وكمان نستفيد منه
الموضوع ده مهم جدا ومفيد
لاننا كده بنحكي قصه من واقعنا احنا بمعنى ان المصدر اكيد موثوق منه
وممكن من القصص دي نحل مشاكل كتير احنا بندور على حل ليها
اتمنى اني اشوف قصه منكم جديده المره الجايه
اخوكم في الله

[الجواب المفقود]

السلام عليكم
اتمنى من الله ان تكون قصصي قد نالت اعجابكم او على الاقل استحسانكم
واتمنى من الله ان تكون قلوبكم قد نالت قسطا من البسمه
ونعود الى حكاوي المقاهي بتاعتنا
وقصتنا النهارده بجد مضكه الى حد ما
طبعا غالبية الاعضاء يعرفون الاخ شارلوك هولمز الباحث عن الحل او لغز الجريمه
فكنت انا في صغري مثل هذا الرجل ولكن ليس في حل لغز الجريمه وانما استكشاف المناطق
اصلي انا كنت ناوي لما اكبر اعمل حاجه للبلد
وطبعا لازم ادرس معالم مصر كلها لمعرفة من اين ابدأ العمل
انتوا عارفين الانتماء للوطن بيعمل حاجات كتير ويحتاج الى حاجات اكتر ومنها الاتي
اعرفكم بنفسي
استاذ ورئيس قسم التوهان في مصر
بمعنى كنت بتوه كثيرا ولا استطيع العوده الى البيت وانتظر من ياتي لاخذي
اعمل ايه بقى بحب الاستكشاف
وكانت المناسبه دي شبه يوميه
انتظر الى يجدني احد فيسالني
انت منين ؟
انا من ......
فين بابا وماما
مش عارف انا عاوز ارجع البيت
من الطبيعي ان الطفل في الحاله دي بيعيط لكن انا لا- مش عارف ليه
المهم
ارجع البيت اجد الاسرة كلها تبحث عني او بمعنى اصح الشارع كله بيبحث عني
اصلي كنت محبوب جدا من المنطقه كلها والحمد لله
وطبعا لازم قصاد هذا الحب ان يدفعوا الثمن الا وهو البحث عني دائما
وفي يوم من الايام كنت كالعاده مع احد الاصحاب وقال لي صديقي
انا ذاهب الى البيت
فسالته ليه ؟
قال لي انه زوجته بتولد
طبعا انا ابو الشهامه كلها ذهبت معه الى البيت
اتذكر اننا كنا في هذا الوقت في المرحله الابتدائيه على ما اذكر
اعتقد ان منكم من سيقول عني اني كنت طفل ساذج
اقول له لا وانما اعتقدت ان ازمة الزواج قد انحلت ويمكن الزواج مبكرا في هذه الايام
طبعا عندما ذهبت الى البيت لم اجد زوجه ولا أي شيء
فين يا بني مراتك
مش عارف استنى لما ندور عليها وبحثنا عنها في كل مكان ولم نجدها وفي النهايه تذكر انه لم يتزوج حتى يومه هذا
فجلسنا نضحك ونتحدث الى ان ........
فجأه الساعه 3
محمد انا عاوز ارجع الى البيت
انا مش عارف بيتك فين يا جواب
اااااااااااااااااااااه
واضح ان عبده التايه هيشتغل تاني
طبعا بحثت في كل مكان عن البيت ولكن هيهات من كان التوهان مهمته
انتظرت ابن الحلال الذي سيوصلني الى البيت وكنت مبتسم
فعندما اتى واحد من الماره سالته
لو سمحت انا عاوز ارجع البيت بس مش عارف
انت بيتك فين؟
انا بيتي في المنطقه الفلانيه
وكنت حافظ اسمي بالكامل وعنواني حتى اصل الى البيت بسهوله
دون ان استعين باحد ولكن .....
المهم
امسك بيدي الى ان اقتربنا من البيت
ونظر لي وانا اسير بجانبه وقال لي
انت مبتسم على ايه ؟
قلتله لاني كل يوم واحد ياتي ليوصلني لاني لا اعرف كيف اعود الى البيت وحدي
ابتسم بسمه عريضه جدا وصلت الى الضحك
ما علينا
المهم عندما عدت الى البيت وجدت ان الشارع كله يبحث عني
وعندما وجدوني شكروا الرجل الذي كان معي وايضا شكرته على توصيلي الى البيت
واخبرته اني سعيد جدا بتوصيله لي
وبعدها سالوني
انت كنت فين ؟
طبعا رديت بكل بساطه
كنت بعمل عملية ولادة لمرات واحد صحبي
طبعا انتوا اكيد عارفين ايه اللي حصل
الناس الغاضبه التي كانت تكاد تجن من تاخيري
وقعت على الارض من جراء كلماتي المضحكه
طبعا سالت نفسي ليه بيضحكوا كده هو عملية الولاده دي مضحكه
ما علينا
سالوني وولدت ولا لسه ؟
طبعا رديت بكل برأة
طبعا طبعا امال ايه هو انا كنت بلعب
وعادوا الى الضحك من جديد الى ان انفض الازدحام
وعاد كل واحد الى بيته
وبعدها دخلنا الى البيت
وجلس والدي بجانبي وقال لي
يا ابني يا حبيبي
مصر كلها عرفت البيت بتعنا مفيش مره ترجع البيت لوحدك ابدا
طبعا رديت بكل برأة
يا بابا انا بحب الناس والاختلاص بيهم عشان كده بحب انهم يوصلوني
واخذت بعدها محاضرة في عدم التوهان وعدم السير مع احد غريب حتى لا يتم اختطافي
وهذه المحاضره كانت يوميه لدرجة اني كنت ارددها معه اثناء قولها
وعندما تاتي جملة انت ممكن تتخطف
ارد واقول
يا بابا تصدق انا مره توهت واحد كان جاي يوصلني وتعرف ايه اللي حصل كمان
ها يا سيدي ايه اللي حصل
وصلته لبيته شوفت بقى الناس طيبه ازاي
انت وصلته لبيته طب ازاي ؟
انت بتشك في قدراتي
على العموم يا بابا اقولك ازاي انا كنت تهت قبل كده في هذه المنطقه
عشان تعرف فائدة ابنك في البلد دي
فجلس يضحك ولكن ليس لفترة طويله
فقد مارست هاويتي في اليوم الذي يليله
فلقد اخبرتكم ان هذه كانت هوايه عندي
هل سمعتوا عنها من قبل
هواية التوهان
وبكده تنتهي قصة عبده التايه النهارده
والمره الجايه معدنا مع قصه جديده
يمكن تكون مع عبده التايه وحكياته او قصه جديده خالص
اتمنى ان القصه تكون عجبتكم
اخوكم
الجواب المفقود

[الجواب المفقود]

شفتوا الشمس بتعمل ايه
بجد يا جماعه الموضوع ده مضحك جدا
في يوم من ايام الجمعه
كنت ذاهب الى الصلاه ولكن لاحظت في هذا اليوم حاجه غريبه جدا
انا عادة اذهب الى المسجد باكرا
ولكن هذا اليوم ذهبت اثناء اذان الظهر
وكان هناك العجب العجاب
وجدت ان المسجد مليئ بالناس بشكل غريب
ولا اجد لنفسي مكان اصلي فيه
على الرغم من ان المسجد كبير الا انه لا يوجد مكان خالي لي
فاندهشت لماذا هذا الازدحام اعتقدت ان هناك جنازه ولهذا تكاثر الناس ولكن لم اجد الجنازه
فسالت نفسي اذا لماذا هذا الازدحام الذي لم ارى مثله من قبل ايه السبب ؟
فحاولت ان اجد مكان باي شكل الى ان وفقني الله الى مكان صغبر جدا
واثناء الخطبه وقع نظري الى خارج المسجد فوجدت الشمس شديده الحراره في الخارج ولم اجد احد يجلس خارج المسجد
فعلمت ان الناس علمت ان درجة الحراره ستكون يوم الجمعه كبيره ولهذا خرج المصليين من بيوتهم مبكرين حتى يجدوا مكان في المسجد بدلا من ان يصلوا خارج المسجد في الشمس
وعجبي
شفتوا الشمس بتعمل ايه
اتمنى ان الشمس تفضل كده على طول عشان الناس تهتم بالذهاب بكار الى المسجد
وكانت دي حكاية الشمس وحرارتها
اخوكم في الله
الجواب المفقود

[النسر]

السلام عليكم ورحمة الله وبركاته
بارك الله فيك اخى ونتظر المزيد جعلها الله فى ميزان حسناتك
نحن قوم أعزّ نا الله بالأسلام ومهما أبتغينا العزّه بغيره ...أذلنا الله
اللهم استخدمنا ولا تستبدلنا يا رب العالمين

[الفارس الاخير]

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههه
والله فكرة جميله جدآآآآآآآآآآآآآآآآآآآآآآآآآآآآآآآآآآآآآآ ورنى افكارك الجديدة يا جواب بس انا افكارى احسن منك
هههههههههههههههههههههههههههههههههههههههههههههههههه ه

[العابده لله]

السلام عليكم ورحمة الله وبركاته...
الى الطفل المعجزه ..
والاستاذ العظيم طبعا ..
حكاياتك زى العسل ...بجد...
وفى انتظار المزيد منك .. ان شاء الله ..
اختك فى الله
العابده لله

[الجواب المفقود]

شكرا اختي في الله العابده لله
انا فعلا سعيد جدا بكلامك الطيب
اتمنى اني اقدم ما هو افقضل لكم
اخوكم في الله

[حياة افضل]

مشكور اخى الكريم على القصص

[الجواب المفقود]

الشكر ليكي انت انك نورتي الموضوع بدخولك اياه
لكن الاجمل انك تشاركي فيه
اخوكي في الله
الجواب المفقود

[حياة افضل]

اشارك فيه

لو كان لدى قصص لكنت حكيتها

لاسف لا يوجد لدى قصص احكيها

وشكرا لك يا اخى الفاضل

[الجواب المفقود]

من فتره حضرت فرح
واحد معرفوش بس هو متطوع معنا في جمعية رساله
المهم رحت وقلت اوجب بقى مع الرجل اول مره اشوفه ولازم نعرف الناس احنا مين وهنعمل ايه
المهم
اول ما دخلت القاعه قلت بس
رحت لبتاع الدي جى وقلتله انا عاوز اقول للعريس كلمة
قالي اوك اخلص بس الجزء ده واديك المايك
انا من عادتي مش بخاف ولا بقلق طالما متاكد اني صح
المهم
الراجل خلص واداني الميك
وفجأه
دراعي وقف
ومبقتش عارف امسك المايك
المهم بدأت اهني عريسنا
واباركله
وكل وشيه دراعي يقف اكتر
لحد ما قلت الدعاء بارك الله لكما وبارك عليكما وجمع بينكما في الخير في المره التالته تقريبا صوتي مطلعش
فين وفين
لما عرفت السبب





























اتاري الميك كان بيكهرب ووقف دراعي بسبب الكهرباء

بس بجد احساس الكهرباء ممتع مش عارف اقولكوا وصف ليه ازاي
بس الموقف ده اتعلمت منه
اني اي فرح معملش فيه جدع تاني
وابعد عن اي مايك في فرح

[السيد هيسوكا]

شكرا يا الجواب المفقود بس من يبي يقول عن نفسه

[الجواب المفقود]

دي مش اهانة لينا دي مجرد دعابة فقط

روحوا عن قلوبكم ساعه بعد ساعه

اخوك الجواب المفقود

[السيد هيسوكا]

حلوه حكايه الميك الكتكهرب بس سؤال ده حقيقي ولا إيه

[الجواب المفقود]

اه والله حقيقي

تفتكر انا ممكن احكي قصه كذب يعني

اخوك في الله

[السيد هيسوكا]

لا بس انا مقرأتش الموضوع أنا قرأت الردود وفهمت من الردود فهم الموضوع عشان كده أنا مش عارف ده حقيقي ولا لا يعني يمكن في قصص من الخيال مش من جه الكذب

[الجواب المفقود]

وانا طالب حصل معايا موقف مضحك جدا

لما تاخد الاربع سنين مباشرة بتلاقي نفسك قاعد جنب نفس الناس طوال الاربع سنين الا اللي بيسقط
المهم

كان قاعد واحد جنبي معرفهوش المهم بعد ما خلصت اخر امتحانفي اخر سنه ليه في الكلية لقيته بينادي عليه

لو سمحت

قلت نعم

قالي انا بقالي اربع سنين قاعد جنبك انت انسان مش ممكن بجد

بقوله ليه

قالي انا كل ما ادخل الامتحان القيك قاعد عمال تكتبت ماشاء الله عليك

هههههههههههههههههههههههههههههههه

ضحكت قوي

اصل اخر ماده تقريبا محلتش فيها حاجه

اصل ايام ما كنت طالب وكنت بمتحن زي اغلب الشباب اليومين دول

كنت لما ادخل الامتحان مكنتش اسيب اي سؤال من غير اجابة

لا اجاوب واقول اي حاجه في السؤال

يارب حتى لو معنديش اجابة اكتب حدث في مثل هذا اليوم كذا وكذا

المهم مسبش سؤال فاضي من غير اجابة

فطبيعي انه يشوفني وانا بكتب لكن والله اغلب الاسئلة كانت كلام فارغ واغلبه ملوش دعوه بالمنهج

وطبعا لما سمع الحكاية قعد يضحك وانا موت على نفسي من الضحك

ومن بعدها بقينا اصحاب

ودي كانت نصيحه ليكوا اكتبوا اي حاجه المهم الورقه متبقاش فاضيه

[الجواب المفقود]

مرات صحبي بتولد وانا في 3 ابتدائي

طبعا محدش فاهم حاجه

افتكروا معايا اني قلتلكوا قبل كده كان زمان اسمي عبده توهان


المهم وانا لسه طالب في المرحلة الابتدائية كان لي صديق اسمه محمد

المهم واحنا بنخلص المدرسة قالي بقولك ايه انا عاوزك تيجي معايا
فقلتله فين
قالي هنروح سوا
قلته خير
قالي مراتي بتولد مش عارف اولدها ازاي
قلتله يا خبر ابيض معقول انا جاي معاك وهولدها لك ان شاء الله
المهم روحنا سوا وطبعا كنا صغيرين فاول ما وصلنا البيت نسينا مراته والاولاده وفضلنا نلعب كورة انا وهو اطفال بقى

صحيح نسيت اقلكوا ان محمد صحبي ده كان 3 ابتدائي زي


المهم طبعا نسيت تماما ان اهلي بيجوا ياخدوني من المدرسة ولما راحوا المدرسة ملقونيش

وابتدت من هنا رحلة البحث عني وعياط وصويت وحالة بكاء مره عليه

المهم اخو محمد روحني في الاخر وانا داخل الشارع لقيت لمه كعادتي مقمدام دخلت في ايه يا جماعه مالكوا

هههههههههههههههههههههههههههههههههههههههه

كهلم سألوا كنت فين

تخيلوا بعد كل اللي عملوه والعياط والبهدلة اللي حصلت

ارد عليهم واقولهم كنت بولد مرات واحد صحبي


طبعا مش هتتخيلوا منظرهم من كتر الضحك

والحمد لله مرات صحبي ان شاء تكون ولدت دلوقتي وجابت لينا المولود المرغوب ان شاء الله

تقبلوا مروري

اخوكم

عبده توهان

[حبيبات رمال]

بسم الله الرحمن الرحيم
السلام عليكم ورحمة الله وبركاته

قصه لطيفه بحق أيام الطفوله راااائعه
فكل شيء بها يكون طاهر وبسيط
عموما أنا بحاول أكتب عن مواقفي لأني بحق حين أبحث أجد الكثير
ولكنها كلها محرجه للغايه لكن أمي اليوم ذكرتنيبموقف محرج لكن ليس كثير ممكن أقوله في يوم


ودمتم بحفظ الرحمن آميييييييييييييييييييييييييييييين يارب العالمين.........

[فاطمة حنفى]

:bismthulth: والله الموقع دا زى العسل ما شاء الله وعلى فكرة انا بشكر اللى عمل الموقع دا جداااااااااااا موقع مواقف وطرائف مضحكة جداااااااا ويارب بارك فيكم وفى الموقع اللى انتو عملتوه يااااااااااااااااااااارب

[فاطمة حنفى]

:ssn::bismthulth: شكرا جدااااااااااااااا على هذا الموقع بس عايزين بقى انك تطوره اكتر وتنزل عليه مواقف كتييييييييييير

[الجواب المفقود]

مرحبا بكم اخوتنا في الله ايه وفاطمة في رحاب المنتدى

وان شاء الله نتطور بيكوا وبكل مسلم نفسه يخدم دينه

ونسال الله ان تكون كل الاعمال هنا خالصة لوجه الله تعالى

بس مش مهم الشكر اكتر من الاشتراك بمواضيع جديده وجذابه ومفيده

اتمنى اننا نشوف قريب المشاركات الفعالة

تقبلوا مروري

اخوكم في الله

[حجاب العفه]

jazaka Allahu khyr
you put a smile on my face
thank you soooooooooo much

[الجواب المفقود]

السلام عليكم ورحمة الله وبركاته

جزانا واياكم اختي في الله

شكرا على المرور العطر

تقبل الله منا ومنك

اخوكم في الله

[moslima]

السلام عليكم
جزاك الله كل خير يا جواب
بجد قصص تحفة كلها
انا هحكلكم على موقف كدة
لسه امبارح بس
هو مش بيضحك بس انا اتفضحت فى الكلية كلها
انا فى مشكلة بمر بيها فى المشكلة المهم اخويا جالى الكلية
عشان يحللى المشكلة
المهم رحنا للدكتورة المسئولة سالنا عن ممكتبها
قاللونا عدوا السطح
يا جماعة كليتنا طوييييييييييلة جدا وكل المبانى منفدة على بعضها
انا سمعت كلمة عدوا السطح قلت بس هبئة متشعلقة فى الهوا
مسكت ايد محمد اخويا وقلتله بلاش يا محمد مش مهم
يلا ننزل
قالى ده انتى يكون ليكى الشرف انك تعدى معايا لسطح
الحمد لله عدينا السطح وقابلنا الدكتورة وطمنتنا شويا
واحنا نازلين الى يلا اعزمك على الغدا
قلتله ماشى عزومة بئة
رحت معاه المطعم وقعدنا وقعد يضحكنى ونسيت الدنيا كلها الحمد لله
موبايلى رن لائيت صحبتى بتقولى انتى فين
قلتلها باكل (فى منتهى البراءة) قالتلى بتاكلى؟؟؟؟ (غالبا كانت هتقفل السكة فى وشى)
قلتلها اه
قالتلى ماشى يا ست هانم بئة انا اصليلك صلاة حاجة واكملك الكتاب ومش قادرة اكل عشانك
وانتى بتاكلى لما تجيلى يا ست هانم
انا قعدت اضحك وهى بتكلمنى مش عارفة على ايه
المهم اخويا عدانى الشارع ورحت الكلية
واول ما دخلت من الباب
كل ما اقابل بنت تقولى ها كلتى ايه انتى واخوكى؟
ها وداكى فين؟ مخدتناش معاكى ليه؟
وتحقيق اتفتح وياريت واحدة فيهم تسالنى عملت ايه فى مشكلتى
نسيوا تماما حاجة فيها اكل بئة
المهم نستفاد ايه من القصة
1- بجد الصديقة بجد بتخاف على صحبتها جدا جدا واى مشكلة اى واحدة بتلائيها التانية بتحس اكنها مشكلتها هى
2- نبطل ندالة مع الصحاب ونطمنهم على طول عشان ممكن نتفضح فى الكلية

[sharp_muslim]

بسم الله الرحمن الرحيم

جزاكم الله خيرا الاخت مسلمة

بس هو السطح ده عبارة عن ايه ؟

سطح كده عادى وبتقفزوا من عليه يعنى ؟ بجد الله مش فاهمه

آخاك

[moslima]

هى المبانى عندنا كلها طويييلة
هو سطح عادى زى اى مبنى مستوى وملوش اسواربنمشى عليه عشان نوصل لدور فى مبنى تانى خالص
والمبنين متصلين ببعض عن طريق السطح ده
هو ده نظام المبانى عندنا تدخل من مبنى وتطلع من مبنى تانى خالص
مغارة علي بابا

[sharp_muslim]

بسم الله الرحمن الرحيم

آه فهمت

جزاكم الله خيرا

[sharp_muslim]

بسم الله الرحمن الرحيم

بمناسبة المواقف الطريفة

أحدهم اتصل بى على الهاتف الارضى وقال بصوت يملاؤه الجدية الاستاذ فلان معاى ؟
قلت لأ انا ابنه ... اى خدمات ؟
قال لى آه ياريت لو سمحت والله تغطى التليفون علشان هنسيىء "نمسح الارضية بالماء والصابون يعنى " السنترال دلوقتى
قلتله حاضر
وغطيت الهاتف بجد وروحت على شغلى

ولما رجعت اكتشفت انها خدعة من احد اصدقائى !

[الجواب المفقود]

السلام عليكم ورحمة الله وبركاته

معنى انك رحت شغلك معناه وانت كبير

معقول للدرجة دي كنت مستعجل على الشغل مخدتش بالك

هههههههههههههههههههههههه

طيب ياترى الخط بقى احسن بعد المسح ولا ايه

[عاشقه فى حب الله]

السلام عليكم ورحمه الله وبركاته
أولا : أحب أن أشكرك على موقف السهو فى الصلاة فأنى فعلا بعانى منها وكان هذا يشعرنى دائما بأنى
مقصرة فى صلاتى ولم أجد حل لها وبعد قراءة مشكلتك وإيجادك لهذا الحل فأنا فعلا هجربوا
وبدعى ربنا يتقبل منا ومنك
ثانيا : عن المواقف المضحكه فالمعروف عنى أنى بعشق البحر جدا لدرجه لم يتصورها أحد ففى أوقات
خروجى من عملى لذهابى للمنزل فاتخيل منظرة الرائع وبدل نزولى فى المحطه المخصصه لى
تجدنى اكمل لاخر الخط واذهب إليه واشاهدة ولو لبعض دقائق واصدقائى لم يسمونى إلا باسم
( المجنونه) فعلا لكن أكيد دة اهون من موقفك مع الطائرة هههههههههههههه

[الجواب المفقود]

السلام عليكم ورحمة الله وبركاته

جزاكم الله خير اختي في الله عاشقة في حب الله

والله موقف الطائرة ده مش عارف حصل ازاي

بس الحمد لله اني معاكوا هنا مش في مكان تاني

وبالنسبة للصلاه كل واحد بيحاول بطريقته

وربنا يتقبل منا ومنك

تقبلوا مروري

اخوكم في الله

[الجواب المفقود]

ايه يا جماعه الضحك اتمنع في حياتنا

اكيد لازم نروح عن قلوبنا ساعة بعد ساعة

مش كده ولا ايه

منتظر قصصكوا الجميلة الي مرت عيلكوا وضحكتوا عليها

تقبلوا مروري

اخوكم في الله

[اسامة خالد]

جزاك الله خير ياأخي الكريم
تقبل مروري